გერმანიის ბუნდესლიგაში მოასპარეზე “ჰამბურგის” ჰოლანდიელი ნახევარმცველი ვან დერ ვაარტი, იტალიის “იუვენტუსის” მაისური მორგების შემთხვევაში თანახმაა, ტურინულ კლუბში თუნდაც მეკარის პოზიცია დაიკავოს.
ამის შესახებ იტყობინება BILD-ი.
“ჰამბურგის” წარმომადგენელი სერენ ლერბი ტურინში იმყოფებოდა, სადაც უკვე ჩაატარა წინასწარი მოლაპარაკებები რაფაელ ვან დერ ვაარტის “იუვენტუსში” გადასვლასთან დაკავშირებით. მომავალ კვირას, იტალიური კლუბის წარმომადგენლები საპასუხო ვიზიტისთვის ემზადებიან და სავარაუდოდ, ჰოლანდიელი ნახევარმცველი, მალე, იტალიურ კლუბს შეუერთდება.
თავად ვან დერ ვაარტი, “ჰამბურგთან” ერთად, მოსამზადებელ შეკრებაზე დუბაიში იმყოფება და იტალიელ ჟურნალისტთა შეკითხვებს იქიდან უპასუხა. “დელ პიერო? – ის ჩემი კუმირია. მასთან ერთად თამაში ჩემი დიდი ხნის ოცნებაა... რანიერი? – კარგი მწვრთნელია... ჩემი საყვარელი პოზიცია? _ ნახევარდაცვაში ნებისმიერ პოზიციაზე, თუმცა, თუ აუცილებელი იქნება, კარში ჩადგომაც შემიძლია”- აცხადებს ჰოლანდიელი ფეხბურთელი.