ინგლისურ საფეხბურთო კლუბს “არსენალს”, სერიოზული საკადრო პრობლემა შეექმნა.
გამოცემა Daily Mail-ის ინფორმაციით, ინგლისის ლიგის თასზე “ტოტენჰემთან” მატჩის შემდეგ, “მეთოფეთა” ლაზარეთი ერთბაშად ოთხი ფეხბურთელით შეივსო _ ტრავმირებულები არიან: რობინ ვან პერსი, ფილიპ სენდეროსი, იოჰან ჯურუ, ტეო უოლკოტი.
პრობლემას გაცილებით ამძიმებს ისიც, რომ აფრიკის ეროვნებათა თასზე გაემგზავრნენ კოლო ტურე, ემანუელ ებოე და ალექს სონგი.
ბუნებრივია, ამის გამო, მეტად შეწუხებულია “არსენალის” მთავარი მწვრთნელი, არსენ ვენგერი.
“ნამდვილი კოშმარია _ ბოლო ორი დღის განმავლობაში შვიდი ფეხბურთელი გამოგვაკლდა. განსაკუთრებით მაფიქრებს დაცვის ცენტრში შექმნილი სიტუაცია”, – განაცხადა ვენგერმა, რომელმაც იქვე იხუმრა _ ჩვენი მდგომარეობა იმდენად მძიმეა, შესაძლოა, მოედანზე გასვლა მე მომიხდესო.
მართალია, “არსენალის” ხელმძღვანელობა ზამთრის სატრანსფერო ბაზარზე გასვლას არ გეგმავდა, მაგრამ ახლა, პრობლემების აღმოსაფხვრელად, ალბათ, ჯიბის შეთხელება მოუწევს.