ESM - ესაა ევროპის სპორტულ გამოცემათა კავშირი, რომელშიც პოპულარული ჟურნალ-გაზეთები შედიან, ისეთები, როგორიცაა ინგლისური ”უორლდ სოკერი”, პორტუგალიური ”ა ბოლა”, გერმანული ”კიკერი”, იტალიური ”გაძეტა დელო სპორტი”, ესპანეთის ”დონ ბალონი” და სხვები.


2007 წელს ამ კავშირმა გადაწყვიტა ფეხბურთელები, მწვრთნელები და ჟურნალისტები გამოეკითხა და ფეხბურთის ისტორიაში 20 საუკეთესო გუნდი, 20 საუკეთესო მატჩი და 20 საუკეთესო გოლი დაედგინა.


* * *


ESM-ის გამოკითხვით ფეხბურთის ისტორიაში ყველა დროის საუკეთესო მატჩად მსოფლიოს 1970 წლის ჩემპიონატის ნახევარფინალი დასახელდა, რომელშიც იტალიის ნაკრებმა მაშინდელი გერმანიის ფედერაციული რესპუბლიკის ნაკრებს დამატებით დროში 4:3 სძლია.


დაუვიწყარ მატჩს მექსიკის დედაქალაქ მეხიკოს სახელგანთქმულმა სარბიელმა ”აცტეკამ” უმასპინძლა - შეხვედრას 102.444 მაყურებელი დაესწრო, რაც ერთ-ერთი მაღალი მაჩვენებელია მსოფლიო ჩემპიონატების ისტორიაში.



თამაში ძალიან დაძაბულად წარიმართა: მე-7 წუთზე იტალიელმა რობერტო ბონინსენიამ გახსნა ანგარიში, მსაჯის საფინალო სასტვენამდე წამებით ადრე კი კარლ-ჰაინც შნელინგერმა გაათანაბრა - 1:1. დამატებითი დროის მე-5 წუთზე მსოფლიო ჩემპიონატის საუკეთესო ბომბარდირმა გერდ მიულერმა დააწინაურა გერმანელები, 98-ე წუთზე ბურგნიჩმა გაათანაბრა, 104-ე წუთზე კი იტალიის ნაკრების ყველა დროის საუკეთესო ბომბარდირმა ლუიჯი რივამ ”სკუადრა აძურა” გაიყვანა წინ. 110-ე წუთზე გერდ მიულერი კვლავ ათანაბრებს ანგარიშს, თუმცა ზუსტად ერთ წუთში ევროპის 1969 წლის საუკეთესო ფეხბურთელად აღიარებულმა ჯანი რივერამ (რობერტო ბონინსენიას პასის შემდეგ) მეოთხე გოლი გაიტანა ზეპ მაიერის კარში - 4:3.


იტალია 1938 წლის შემდეგ პირველად გავიდა მსოფლიო ჩემპიონატის ფინალში, სადაც ბრაზილიის ნაკრებთან 1:4 დამარცხდა.


”ნამდვილად არ მიკვირს, რომ ეს მატჩი ფეხბურთის ისტორიაში საუკეთესოდ აღიარეს,” - განაცხადა ამ შეხვედრის მონაწილემ, მსოფლიოს 1974 წლის ჩემპიონმა ფრანც ბეკენბაუერმა, - ”დიდებული პაექრობა იყო, რომლის დამატებით დროს ჟურნალისტებმა ”კალათბურთი საფეხბურთო მინდორზე” უწოდეს. თუ რატომ, ამას მგონი, შესანიშნავად ხვდებით.”


იმ შეხვედრაში მეტოქეებმა შემდეგი შემადგენლობებით ითამაშეს:

იტალია: ალბერტოზი, ბურგნიჩი, ჩერა, ბერტინი, როზატო (პოლეტი 94), მაცოლა (რივერა 46), ფაკეტი, დე სისტი, დომენგინი, ბონინსენია, რივა

გფრ: მაიერი, შნელინგერი, ფოგთსი, პაცკე (ჰელდი 66), შულცი, ბეკენბაუერი, ოვერატი, ზეელერი, გრაბოვსკი, მიულერი, ლორი (ლიბუდა 52)


მატჩს მექსიკელი არბიტრი არტურო იამასაკი სჯიდა.


* * *


მსოფლიოს 20 საუკეთესო მატჩი


1.იტალია - გფრ 4:3 (17.06.1970; მსოფლიო ჩემპიონატის ნახევარფინალი)

2.”ლივერპული” – ”მილანი” 3:3 (პენ 3:2) (25.05.2005; ჩემპიონთა ლიგის ფინალი)

3.”რეალი” – ”აინტრახტი” 7:3 (18.05.1960; ჩემპიონთა თასის გათამაშების ფინალი)

4.გფრ - საფრანგეთი 3:3 (პენ 5:4) (08.07.1982; მსოფლიო ჩემპიონატის ნახევარფინალი)

5.უნგრეთი - ურუგვაი 4:2 (30.09.1954; მსოფლიო ჩემპიონატის ნახევარფინალი)

6.საფრანგეთი - ბრაზილია 1:1 (პენ 4:3) (21.06.1986; მსოფლიო ჩემპიონატის მეოთხედფინალი)

7.ინგლისი - გფრ 4:2 (30.07.1966; მსოფლიო ჩემპიონატის ფინალი)

8.ბრაზილია - იტალია 4:1 (21.06.1970; მსოფლიო ჩემპიონატის ფინალი)

9.”ბენფიკა” – ”რეალი” 5:3 (02.05.1962; ჩემპიონთა თასის გათამაშების ფინალი)

10.ინგლისი - უნგრეთი 3:6 (25.11.1953; ამხანაგური მატჩი)

11.გფრ - უნგრეთი 3:2 (04.07.1954; მსოფლიო ჩემპიონატის ფინალი)

12.იტალია - ბრაზილია 3:2 (05.07.1982; მსოფლიო ჩემპიონატი, მეორე ჯგუფური ეტაპი)

13.ბრაზილია - ურუგვაი 1:2 (16.07.1950; მსოფლიო ჩემპიონატის ფინალი)

14.”მანჩესტერ იუნაიტედი” – ”ბაიერნი” 2:1 (26.05.1999; ჩემპიონთა ლიგის ფინალი)

15.”ბლეკპული” – ”ბოლტონი” 4:3 (02.05.1953; ინგლისის თასის გათამაშების ფინალი)

16.”ლივერპული” – ”ალავესი” 5:4 (16.05.2001; უეფა-ს თასის გათამაშების ფინალი)

17.საფრანგეთი - პორტუგალია 3:2 (23.06.1984; ევროპის ჩემპიონატის ნახევარფინალი)

18.”ბარსელონა” – ”ფორტუნა” (დ) 4:3 (16.05.1979; თასების მფლობელთა თასის გათამაშების ფინალი)

19. გერმანია - იტალია 0:2 (04.07.2006; მსოფლიო ჩემპიონატის ნახევარფინალი)

20.გფრ - ჰოლანდია 2:1 (24.06.1990; მსოფლიო ჩემპიონატის მერვედფინალი)