გაზეთ მარკას მიერ გავრცელებული ინფორმაციით, სამპდორია თანახმაა, ანტონიო კასანოში გადაიხადოს რეალის მიერ მოთხოვნილი თანხა, ანუ 5,5 მილიონი ევრო.

კასანო სამპდორიაში ამ ზაფხულს არენდით გადაბარგდა და უმალ გუნდის ლიდერად იქცა. მიმდინარე სეზონში ანტონიომ 9 მატჩში 3 გოლი გაიტანა და 4 საგოლე პასი გააკეთა. გარდა ამისა, “ხულიგანმა” ძველი დრო გაიხსენა და მეტოქე მცველების გაბითურებაც დაიწყო. ამ ყველაფრის შემდეგ გაჩნდა ვარაუდი, თითქოს ის რეალში ბრუნდებოდა, თუმცა თავად კასანომ უარი განაცხადა ბლანკოსში დაბრუნებაზე და სამპდორიაში დარჩენა გადაწყვიტა.
მარკამ გაავრცელა სამპდორიას გენერალური დირექტორის, ბეპე მაროტას კომენტარიც: “კასანო დიდებულად თამაშობს და ყველაფერს გავიღებთ იმისათვის, რომ ანტონიო გენუაში დარჩეს. დარწმუნებული ვარ, რეალთან ტრანსფერთან დაკავშირებით პრობლემები არ შეგვექმნება. ”
რეალსა და სამპდორიას შორის ზაფხულში გაფორმებული საიჯარო კონტრაქტის მიხედვით, კასანოს გამოსყიდვა 5,5 მილიონ ევროდ შეიძლება, თუ რა თქმა უნდა, კლუბებს შორის შეთანხმება შედგა. თუმცა, ფიფას ახალი კანონის თანახმად, ფეხბურთელს თავადაც შეუძლია საკუთარი კონტრაქტის გამოსყიდვა. კასანოს აღნიშნული უფლებით სარგებლობის შემთხვევაში 4 მილიონი ევროს გადახდა მოუწევს, თუმცა საკუთარი ჯიბიდან, რაზეც ანტონიო თანახმაა.
შეგახსენებთ, რომ თავის დროზე, იტალიელი რეალმა 6 მილიონ ევროდ იყიდა. კასანოს პრიმერადივიზიონში 19 მატჩში 2 გოლი აქვს გატანილი.