ინგლისის ეროვნული ნაკრების იტალიელმა მთავარმა მწვრთნელმა ფაბიო კაპელომ განაცხადა, რომ უკვე აქვს წარმოდგენილი, თუ როგორ ითამაშებს მის მიერ გაწვრთნილი ინგლისის ეროვნული ნაკრები.
ამის შესახებ "Спорт Сегодня" იტყობინება.
“მე უკვე ვიცი, თუ როგორ უნდა ითამაშოს ინგლისის ნაკრებმა. ამ გუნდის რამდენიმე თამაშის ვიდეოჩანაწერი ვნახე და დასკვნები აქედან გამომდინარე გამოვიტანე. იმისათვის, რომ ჩემი იდეა რეალურად განვახორციელო, ფეხბურთელები უკეთ უნდა გავიცნო. არა მხოლოდ მათი ტექნიკური მაჩვენებლები, არამედ ტაქტიკური მონაცემები უნდა შევისწავლო. ხუთი ამხანაგური მატჩი, რომლებსაც სექტემბრის თვემდე გავმართავთ, დამეხმარება იმის გარკვევაში, თუ როგორი სათამაშო სტილი ექნება გუნდს. იმედი მაქვს, ტრავმებს თავიდან ავიცილებთ. უკვე მივხვდი, რომ ინგლისის ნაკრები განსაკუთრებული გუნდია~, _ განაცხადა კაპელომ.
იტალიელმა სპეციალისტმა მადრიდის “რეალში” მისი ყოფნის პერიოდიც გაიხსენა და ინგლისის ნაკრების კაპიტნის საკითხსაც შეეხო.
“მადრიდის “რეალში” მუშაობის დროს, ზეწოლას შევეჩვიე, თუმცა “რეალი” მაინც კლუბი გახლდათ, ახლა კი მთელი ერი მიყურებს. ჯერჯერობით, არ გადამიწყვეტია, თუ ვინ იქნება ნაკრების კაპიტანი, ეს კი ინგლისისთვის მნიშვნელოვანი წოდებაა. კაპიტანი ლიდერი უნდა იყოს და გადაწყვეტილებას კარგად მოფიქრების შემდეგ მივიღებ. ბექჰემს ჯერ არ შევხვედრივარ. მუშაობის პირველი კვირის განმავლობაში მქონდა შეხვედრები და ინგლისურ ენას ვსწავლობდი. ბექჰემს ინგლისელები დიდ ყურადღებას უთმობენ, მაგრამ ყველასათვის ცნობილია, რომ ჩემთვის ყველა ფეხბურთელი თანაბარია” – ამბობს კაპელო.