ESM - ესაა ევროპის სპორტულ გამოცემათა კავშირი, რომელშიც პოპულარული ჟურნალ-გაზეთები შედიან, ისეთები, როგორიცაა ინგლისური ”უორლდ სოკერი”, პორტუგალიური ”ა ბოლა”, გერმანული ”კიკერი”, იტალიური ”გაძეტა დელო სპორტი”, ესპანეთის ”დონ ბალონი” და სხვები.


2007 წელს ამ კავშირმა გადაწყვიტა ფეხბურთელები, მწვრთნელები და ჟურნალისტები გამოეკითხა და ფეხბურთის ისტორიაში 20 საუკეთესო გუნდი, 20 საუკეთესო მატჩი და 20 საუკეთესო გოლი დაედგინა.


* * *


ESM-ის გამოკითხვით ფეხბურთის ისტორიაში ყველა დროის საუკეთესო გოლად მსოფლიოს 1986 წლის ჩემპიონატის მეოთხედფინალში, არგენტინა-ინგლისის მატჩში დიეგო მარადონას მიერ 54-ე წუთზე გატანილი ბურთი აღიარეს.


ეს პირველი შემთხვევა არ არის, როცა მარადონას ამ შედევრს ყველა დროის საუკეთესო გოლად აღიარებენ: რამდენიმე წლის წინ ეს ბურთი მსოფლიო ჩემპიონატების ყველა დროის საუკეთესო გოლად აღიარეს.


ინგლისთან იმ მატჩში მარადონამ ორი გოლი გაიტანა. პირველს, რომელიც რამდენიმე წუთით ადრე ხელით შეაგდო, მარადონამ ”ღმერთის ხელი” უწოდა. ჟურნალისტებმა ამ გოლს, 54-ე წუთზე გატანილს, ხუმრობით ”ღმერთის ფეხი” შეარქვეს.


ტყავის ბურთის გენიოსმა არგენტინელმა 60 მეტრი 10,8 წამში გაირბინა(!), გზად პიტერ რიდი, პიტერ ბერდსლი, ტერი ბატჩერი, ტენი ფენვიკი, ბოლოს კი მეკარე პიტერ შილტონიც მოატყუა და ულამაზეს სოლო-რეიდს დაუსვა წერტილი. ხორხე ბურუჩაგამ, რომელმაც მოედნის ცენტრში მიაწოდა ბურთი, თამაშის შემდეგ იხუმრა, ისეთი პასი მივეცი დიეგოს, გოლი რომ არ გაეტანა, არ შეიძლებოდაო.


”ასეთ გოლზე ბავშვობიდან ვოცნებობდი. ყოველთვის, როცა ჩანაწერს ვუცქერ, მიკვირს, როგორ მოვახერხე გოლის გატანა. სხვათა შორის, რამდენიმე წლით ადრე, არგენტინის ნაკრების ევროპული ტურნეს დროს, ”უემბლიზე” მსგავსი სოლო-რეიდი განვახორციელე, თუმცა მეკარე კარიდან გამოვიდა და მაშინ ბურთი კარს ავაცილე... ძალიან ბედნიერი ვარ, რომ ჩემი გოლი საუკეთესოა მსოფლიო ჩემპიონატების ისტორიაში,” - განაცხადა შედევრის ავტორმა.


* * *


მსოფლიოს 20 საუკეთესო გოლი


1.დიეგო მარადონა (არგენტინა) (22.06.1986; მსოფლიო ჩემპიონატის მეოთხედფინალი: არგენტინა-ინგლისი 2:1; 54-ე წუთი - 2:0)

2.მარკო ვან ბასტენი (ჰოლანდია) (25.06.1988; ევროპის ჩემპიონატის ფინალი: ჰოლანდია-სსრკ 2:0; 53-ე წუთი - 2:0)

3.ზინედინ ზიდანი (საფრანგეთი) (15.05.2002; ჩემპიონთა ლიგის ფინალი: ”რეალი”-”ლევერკუზენი” 2:1; 44-ე წუთი - 2:1)

4.საიდ ოვაირანი (საუდის არაბეთი) (29.06.1994; მსოფლიო ჩემპიონატის ჯგუფური ეტაპი: საუდის არაბეთი-ბელგია 1:0; მე-5 წუთი - 1:0)

5.პელე (ბრაზილია) (29.06.1958; მსოფლიო ჩემპიონატის ფინალი: ბრაზილია-შვედეთი 5:2; 55-ე წუთი - 3:1)

6.არჩი ჯემილი (შოტლანდია) (11.06.1978; მსოფლიო ჩემპიონატის ჯგუფური ეტაპი: შოტლანდია-ჰოლანდია 3:2; 68-ე წუთი - 3:1)

7.კარლოს ალბერტო (ბრაზილია) (21.06.1970; მსოფლიო ჩემპიონატის ფინალი: ბრაზილია-იტალია 4:1; 87-ე წუთი - 4:1)

8.ფერენც პუშკაში (უნგრეთი) (25.11.1953; ამხანაგური მატჩი: ინგლისი-უნგრეთი 3:6; 22-ე წუთი - 1:3)

9.დიეგო მარადონა (არგენტინა) (25.06.1986; მსოფლიო ჩემპიონატის ნახევარფინალი: არგენტინა-ბელგია 2:0; 63-ე წუთი - 2:0)

10.ლიონელ მესი (არგენტინა) (19.04.2007; ესპანეთის თასის გათამაშების ნახევარფინალი: ”ბარსელონა”-”ხეტაფე” 5:2; 28-ე წუთი - 2:0)

11.რიკარდო ვილია (არგენტინა) (14.05.1981; ინგლისის თასის ფინალი: ”ტოტენჰემ ჰოთსფური”-”მანჩესტერ სიტი” 3:2; 76-ე წუთი - 3:2)

12.რაიან გიგზი (უელსი) (14.04.1999; ინგლისის თასის ნახევარფინალი: ”მანჩესტერ იუნაიტედი”-”არსენალი” 2:1; 109-ე წუთი - 2:1)

13.რივალდო (ბრაზილია) (17.06.2000; ესპანეთის ჩემპიონატი: ”ბარსელონა”-”ვალენსია” 3:2; 89-ე წუთი - 3:2)

14.დენის ბერხკამპი (ჰოლანდია) (04.07.1998; მსოფლიო ჩემპიონატის მეოთხედფინალი: ჰოლანდია-არგენტინა 2:1; 90-ე წუთი - 2:1)

15.ესტებან კამბიასო (არგენტინა) (16.06.2006; მსოფლიო ჩემპიონატის ჯგუფური ეტაპი: არგენტინტა-სერბია-ჩერნოგორია 6:0; 31-ე წუთი - 2:0)

16.მაიკლ ოუენი (ინგლისი) (30.06.1998; მსოფლიო ჩემპიონატის მერვედფინალი: არგენტინა-ინგლისი 2:2; მე-16 წუთი - 1:2)

17.რობერტო ბაჯო (იტალია) (19.06.1990; მსოფლიო ჩემპიონატის ჯგუფური ეტაპი: იტალია-ჩეხოსლოვაკია 2:0; 78-ე წუთი - 2:0)

18.ჯორჯ ბესტი (ჩრდილოეთ ირლანდია) (02.10.1971; ინგლისის ჩემპიონატი: ”მანჩესტერ იუნაიტედი”-”შეფილდ იუნაიტედი” 2:0; 84-ე წუთი - 2:0)

19.გერდ მიულერი (გფრ) (14.06.1970; მსოფლიო ჩემპიონატის მეოთხედფინალი: გფრ-ინგლისი 3:2; 106-ე წუთი - 3:2)

20.ჰელმუტ რანი (გფრ) (04.07.1954; მსოფლიო ჩემპიონატის ფინალი: გფრ-უნგრეთი 3:2; 83-ე წუთი - 3:2)